ශ්‍රී ලංකාවේ කොළඹ බලා ධාවනය වෙමින් තිබූ විශාල නෞකාවක් ඊයේ (26) අමෙරිකාවේ බැල්ටිමෝර්හි විශාල පාලමක ගැටී එය කඩා වැටීමෙන් දරුණු අනතුරක් සිදු විය.
“ඩාලි” නම් මෙම විශාල නෞකාව අඟහරුවාදා (26) අලුයම් කාලයේ දී මෙලෙස බැල්ටිමෝර් හි ප්‍රධාන පාලමක ගැටී ඇත. Francis Scott Key Bridge ලෙස නම් කර ඇති මෙම පාලම බැල්ටිමෝර් හි ගමනාගමනය සඳහා ඉතා වැදගත් වන අතර ගමනාගමන කටයුතු සම්පූර්ණයෙන් අඩාල කරමින් අනතුරෙන් පසු පාලමේ විශාල කොටසක් ගඟට වැටී ඇත.
යම්කිසි දෝෂයක් නිසා පාලමේ ගැටීමට පෙර ඩාලි නෞකාවෙහි විදුලි බලය විසන්ධි වූ බව වාර්තාවේ. කාර්ය මණ්ඩලය ආපදා අනතුරු ඇඟවීමේ ඇමතුමක් අදාල බලධාරීන් වෙත ක්ෂණිකයකින් යැවූවද, කිසිඳු ආරක්ෂක ක්‍රියා මාර්ගයකට ඉඩක් නොතබමින් නෞකාව පාලමෙහි ප්‍රධාන ආධාරක කුළුනක වැදී අනතුර ඉතා වේගයෙන් සිදුව තිබේ.
මෙම අනතුරින් අවාසනාවන්ත ලෙස හය දෙනෙකු මිය ගොස් ඇති බව දැනට වාර්තා වේ. ඔවුන් බොහෝ විට පාලමෙහි නඩත්තු කටයුතු කරමින් සිටි ඉදිකිරීම් කම්කරුවන් බව පැවසේ. තවත් දෙදෙනෙක් අනතුරින් දිවි ගලවාගෙන තිබේ.
මේ පිළිබඳ පරීක්ෂණ සිදු කරන නලධාරීන් උත්සාහ කරන්නේ ඩාලි නෞකාවේ විදුලිය නැතිවීමට හේතුව කුමක්ද යන්න හරියටම සොයා ගැනීමටයි. අනාගතයේදී මෙවන් ඛේදවාචකයන් වළක්වා ගැනීම සඳහා ඔවුන් අනතුර සිදුවූ ආකාරය පිළිබඳ ගැඹුරින් සොයා බලමින් සිටී.
මෙම අනතුරින් පසු එය අලුත්වැඩියා කරන කාලය අතරතුර විකල්ප මාර්ග භාවිතා කළයුතු බැවින් බැල්ටිමෝර් හි ජනතාව ඉදිරි කාලයේ දී විශාල ගමනාගමන ගැටළු වලට මුහුණ දීමට නියමිතය.